Mundartgedichte von Dieter Radl
Annerberchfest in da Fräih
schdraafd s’zammerdaddschde Gros,
da Dunsd unt halt as Dol nu kold,
im Nordhang hoggd a Hos!
Du loinsd aloins aafara Benk
und schausde ummadum,
häijasdas glawern vo da Schenk,
am Bun ligd Haaffer Glump!
Semfdaschmierde Babberdeggl,
Schdraouholm, Daschndäichler,
Bärndreegguggern, Wafflbreggl,
Dudsl, Blasdigfläicher!
In Gallmünz drärm bliddsn Fenster,
z’Lindhuf, wäi gschniddsd, a Gaal,
da Weiher drunt, wäi Schbäigl glendsder,
da Kulm, a schworzer Kaal!
D‘Schod waasserd midn Schbriznwong,
a Hund schdreind aner Budn,
zölsd mid bis siem beim Gloggnschlong,
da Begger druggd aaf d’Hubbn!
Di Minisdrantn homs brässant,
husern in Kreizweech aaffer,
Clofrau mid Oimer, Scheiersand,
buggdse oi aaf d’Heislschdabbfl!
Mirgsd gaouer nird, wäi d’Zeid vagäid,
as Erschde leits vo drom,
da Mesner hurchd, obs Mikro gäid –
Sankt Anna gülts zum Lom!
© Dieter Radl